في محطات المحولات، محولات القوى Power Transformers اللي بتعتمد على الزيت كوسيط تبريد وعزل لما الحمل بيزيد، درجة حرارة الملفات (Windings) بترتفع، وبالتالي حرارة الزيت بتزيد وحجمه بيتمدد. الزيت الزيادة ده بيروح فين؟ بيطلع على الـ Conservator Tank (خزان التمدد). هنا الهواء الموجود فوق سطح الزيت في الخزان بيخرج لبرا. والعكس بيحصل لما المحول يبرد، الزيت ينكمش ومستواه ينزل، فالمحول بيحتاج يسحب هواء من الجو الخارجي.
الهواء الخارجي دايماً محمل بنسب رطوبة، وزي ما إحنا عارفين في الجهد العالي المياه هي العدو الأول للزيت. دخول أي جزيئات مياه للزيت بيؤدي لكوارث.. زي إيه ؟
الرطوبة هي العدو الأول للـ Dielectric Strength (جهد الكسر) بتاع زيت المحول. زيت المحول لازم يحافظ على خاصية العزل الكهربي، ودخول جزيئات المية بيقلل الـ Breakdown Voltage بشكل مرعب، وده ممكن يسبب Internal Flashover أو Partial Discharge يدمر الملفات.
هنا بييجي دور الـ Silica Gel اللي موجودة جوه الـ Breather عشان تضمن إن الهوا اللي داخل ده جاف تماماً من الرطوبة
أشهر انواع الـ Silica Gel هو اللي اللون الأصلي بتاعه بيكون أزرق غامق، ولما بيتشبع بالرطوبة بيتحول للون الوردي.
استلام وتركيب الـ Breather في الموقع
نيجي بقى للكلام العملي بتاعنا كمهندسين تنفيذ. الـ Breather بييجي غالباً مفكوك أو راكب جزئياً علشان النقل.. لما تيجي تستلم الـ Breather وتركبه، لازم تركز في النقط دي:
- جسم الـ Breather غالباً بيكون من الزجاج المقوى أو البلاستيك الشفاف. لازم تتأكد إنه سليم 100% ومفيهوش أي شروخ حتي ولو بسيطة،الشروخ دي لو موجودة، الهواء هيدخل منها مباشرة للمحول، والسيليكا جيل مش هيكون ليها أي لزمة.
- الربط بين الـ Breather وماسورة الـ Conservator لازم يكون بـ Gasket محترم ونضيف. لو الچوان مش راكب صح، المحول هيسحب هوا من “الزور” بتاع التنفس (اللي هو الماسورة اللي واصلة بين الـ Breather والـ Conservator Tank) مش من خلال المادة المجففة.
- إوعي تنسي الـ Oil Cup (مصيدة الزيت) .. تحت الـ Breather بيكون فيه كوباية صغيرة (Oil Cup). دي أهم جزء فني ومع ذلك ناس كتير بتهملها. الكوباية دي لازم تتملي زيت محولات لحد العلامة الموضحة (Oil Level Mark).
ودي مقالة كاملة منفصلة عن الـ Oil Cup
- تعبئة السيليكا چيل، لو الـ Breather جاي فاضي (أو حتي لو كان مليان بس لقيت لونه متغير طبيعي هتغيره)، لازم تعبيه من العبوات المتبرشمة. ماتفتحش عبوة السيليكا چيل إلا وقت التركيب علشان متلقطش رطوبة من الجو وأنت واقف.
- الـ Breather بييجي راكب عليه طبّات بلاستيك أو كاوتش بتكون سادّة فتحات دخول الهواء عشان التخزين.. لازم تتأكد انك شيلت كل الطبّات دي، وكمان لازم تتاكد اتأكد إن الفتحات اللي في غطا الـ Breather مش مسدودة بأي شحم أو تراب موقع
زي ما شوفت، الـ Silica Gel Breather ممكن تبان مجرد Accessory بسيط، لكنها فعلياً عنصر Critical جداً للحفاظ على المحول.
هدفنا إن الموقع ده يكون مرجعك الأساسي لكل تفصيلة في المحطات، من أول الـ Installation لحد الـ Commissioning، بشرح عملي وحقيقي من قلب الموقع بعيداً عن الشرح الأكاديمي الممل والسلايدات المكررة.
لو عايز تتقن تنفيذ المحطات ، ف انت محتاج تدخل هنا :