ماكينة الـ DILO ، او DILO Machine، أو الـ SF6 Machine كلها مصطلحات بنقولها في الموقع علي أهم ماكينة موجودة عندنا في الموقع بتاعنا لأنها بتتعامل مع غاز الـ SF6 اللي هو اساس العزل في محطة الكهرباء بتاعتنا.
في المقالة دي هنتكلم علي بعض النقاط المهمة والأساسية اللي لازم تكون عارفها وفاهمها كمهندس تنفيذ شغال في موقع إنشاء محطة كهرباء مهما كان حجم المحطة.
بس قبل ما نبدأ تقرأ، لازم تكون مستحضر في ذهنك كده تصور عام عن الموضوع حتي لو معندكش فكرة عنه، وده علشان تستفيد اكبر استفادة .. يعني انت دلوقتي كل معلوماتك عن ماكينة الديلو هي انها بتتعامل مع غاز الـ SF6، فكر كمهندس موقع انت ايه اللي محتاج تعرف عن الماكينة دي؟
أولاً: إيه هي الوظيفة الأساسية لماكينة الـ DILO ؟
ماكينة الديلو ليها اكتر من وظيفة يعني ببتقدر تسحب الغاز من أي حجرة غاز Gas Compartment ف يالـ GIS ، وتنقيه، وتجففه، وتخزنه،وتعيد تعبئته من جديد، وكمان بتقدر تفرغ الـ Compartment اللي هنشتغل عليه من الهواء يعني بتعمله عملية Vacuum، يعني تقدر تعتبرها مصنع متنقل لخدمة غاز الـ SF6، وخلينا نشرح النقط اللي قولناها دي نقطة نقطة.
1. سحب الغاز (SF6 Recover):
ماكينة الديلو بتسحب الغاز من أي حجرة غاز (Gas Compartment) في الـ GIS وتوصلها لضغط منخفض جداً (يعني بتعملها عملية فاكيوم) الضغط ده قيمته بتوصل لأقل من 1 mbar، ده معناه إنها بتشفط كل ذرة غاز موجودة في الـ Compartment.
2. التخزين (Storage):
الغاز اللي اتسحب ده مش بيترمي. الماكينة فيها كمبروسور (Compressor) قوي بيكبس الغاز ده ويحوله لصورة سائلة ويتخزن جوه تانك التخزين الخاص بالماكينة.
3. التنقية والتجفيف (Purifying and Drying):
ودي أهم نقطة، الغاز وهو بيتسحب، أو وهو بيتملي، بيعدي على منظومة فلاتر جبارة (Particle and Dry Filters) بتشيل منه أي شوائب معدنية دقيقة (نواتج الـ Arcing مثلاً) وأهم حاجة: بتشيل منه أي رطوبة (Moisture).
4. إعادة الملء (Refilling):
بعد ما الحجرة بقت نضيفة وجاهزة، الماكينة بتبدأ ترجع الغاز النضيف اللي خزنته ونقتيته تاني للحجرة لحد ما توصله لضغط التشغيل (Operating Pressure) المطلوب بالظبط.
5. تفريغ الهواء (Evacuation of Air):
لو الـ Compartment اللي انت هتشتغل عليه ده لسا اول مرة يتملي بالغاز، يعني احنا لسا مخلصين تركيب الـ GIS وعايزين نملاه بغاز الـ SF6 ف أول خطوة لازم تتعمل هي تفرغ كلي للهواء اللي موجود في الـ Compartment.
ملحوظة علي السريع: سحب الهواء او تفريغ الهواء دي حاجة أي Vacuum Machine ممكن تعملها عادي مش لازم ماكينة الديلو، لكن أي تعاملة مع الغاز لازم يتم من خلال ماكينة الديلو. وده المفروض ينورلك لمبة كده كمهندس تنفيذ، إن انت لو عندك GIS Bays كتير، أكيد لما تيجي تشتغل وعايز تنجز الشغل بسرعة مش هتطلب عدد كبير من الـ DILO Machine هيبقي خراب بيوت للشركة، إنما الصح انك تطلب كذا Vacuum Machine علشان يفرغو الهواء من الـ Compartments وبعدها تدخل ماكينة الديلو تعبي الغاز علي طول.
ثانياً: تجهيزات ما قبل التشغيل
من ضمن الحاجات اللي المفروض تكون حاضرة في ذهنك (زي ما طلبت منك في أول المقالة) إنك تكون شايف الشغل من فوق، إنت مهندس .. لازم تكون عامل حساب خطواتك اللي جاية.
خلينا نفكر مع بعض بصوت عالي .. وده المفروض يكون sequence التفكير بتاعك في أي شغل عموماً مش في الموضوع ده بس.
إنت دلوقتي عايز خلاص تبدأ تملأ الغاز في الـ GIS Compartments، ف عملت طلب لمدير المشروع أو لإدارة المعدات أياً كان الهيكل الوظيفي في الشركة إنك عايز ماكينة الـ DILO .. فيه شوية حاجات أساسية لازم تأكد عليها، وهي الـ Site Readiness إنك تتأكد إن الموقع جاهز للشغل وفعلا فيه جزء كبير خلصان يستاهل اني اطلب ماكينة الديلو علشان أكيد مش هجيبها اخلص المتاح واقعدها جمبي تعد عليا إيجار ع الفاضي، وبعدين هنتأكد من توفر الشخص اللي هيشتغل علي الماكينة (Manpower) ، المعدة نفسها (Equipment)، طب ايه الـ Material اللي انا هشتغل عليها ؟ الـ Material هنا هي غاز الـ SF6، بالتالي لازم تتأكد من توافر إسطوانات غاز الـ SF6 بالكمية المطلوبة، وغير كده هتشوف الوقت اللي المفروض تخلص فيه الشغل ده Time Schedule علشان علي اساسه هتحدد هتطلب كام ماكينة ديلو، ولو فيه أي مصدر كهرباء خارجي هتحتاجه Power Source .. يبقي نقدر نلحص الكلام ده في النقاط التالية :
– Site Readiness
– Manpower
– Equipment
– Material
– Time Schedule
– Power Source
ال6 نقط اللي فاتو دول يكونو في ذهنك دايماً لأنهم أساسيين في أي شغلانة بترتبلها كمهندس موقع.
نرجع لموضوعنا، ماكينة الديلو مش لعبة، دي ماكينة سعرها مئات الآلاف وبتتعامل مع غاز الـ SF6 اللي بيكون تحت ضغوط عالية جداً. بالتالي ممنوع أي شخص غير مؤهل إنه يتعامل معاها.
أثناء توصيل الماكينة لازم تتأكد إن الفولت اللي طالع من المولد وواصل للماكينة مطابقة للجهد الخاص بالماكينة، وتتأكد كذلك من إتجاه الدوران لأن زي ما اتفقنا إنك بتتعامل مع ماكينة 3-phase، ومعتمدة على طرمبات وكمبروسورات. لو Phase Sequence مقلوب، الماكينة هتلف بالعكس. طيب تكلفة الغلطة دي إيه ؟
في ثواني ممكن تحرق الكمبروسور أو طرمبة الفاكيوم. عشان كده، أول ما بتشغل الماكينة، عينك على سهم اتجاه الدوران اللي على الموتور أو الشاشة. لو غلط، الماكينة بتديك Error. ساعتها بتعكس فازتين من الكابل الرئيسي عن طريق مفتاح (Reversing Switch) بيبقى موجود في الماكينة.
إوعي تشغل الماكينة وهي بتلف غلط .. ها .. إوعي !
ثالثاً: دورة التشغيل كاملة
مبدأياً إنت كمهندس مش انت اللي بتشغل الماكينة دي، وبيبقي فيه فني مخصوص يشتغل عليها، لو انت مأجر الماكينة في الغالب الشركة بتأجرها بالمشغل بتاعها علشان لو لاقدر الله حصل اي عطل او مشكلة في الماكينة. ولو الماكينة دي ملك للشركة بتبقي مخصصة ومدربة فني معين هو المسئول عن تشغيلها، بس طبعا كمهندس تنفيذ لازم تبقي عارف وفاهم اللي بيحصل حواليك، خصوصاً إن اي حد بيشتغل بيكون تحت مسئوليتك، ونجاح الشغل وتنفيذه علي أكمل وجه هي مسئوليتك.
دلوقتي إحنا عندنا GIS Compartment (سواء بقا قاطع أو سكينة أو باسبار .. إلخ) إتركب، واتقفل، وجاهز يستقبل شحنة غاز SF6 لأول مرة.
سامعك ياللي بتقول يلا نوصله بماكينة الديلو علي طول ونشتغل .. غلط
بص، في المهمات الخاصة بالمحطة كلها .. أعدائك هما الهواء والرطوبة .. إوعي تنساهم!
الخطوة الاولي نقضي علي أعدائنا:
هتوصل الـ Compartment اللي هتشتغل عليه بماكينة الديلو، وتشغل الفاكيوم، إسحب بقا كل الهوا والرطوبة اللي موجودين في الـ Compartment لحد ما الشاشة تقرأ ان الضغط اللي موجود بقا اقل من 1 mbar .
ملحوظة: الخطوة دي مينفعش تستعجل فيها. ممكن تاخد ساعات طويلة وأحياناً يوم كامل حسب حجم الـ Compartment وكمية الرطوبة اللي جواه. إنت مش بس بتسحب الهوا، إنت بتدي فرصة للرطوبة تتبخر وتتسحب.
الخطوة التانية:
هتقولي اللي هي نملأ بقا اسطوانة الـ Compartment بتاعنا م احنا قضينا علي اعدائنا (الهواء والرطوبة) .. هقولك هو احنا هنعمل كده آه بس في الخطوة التالتة مش التانية، الخطوة التانية مش هنعمل حاجة .. هنستني .. هنقف نتفرج.. إحنا خلاص عملنا الفاكيوم وقفلنا المحبس .. نسيبها كده من نص ساعة لساعة ونراقب عداد الضغط هيزيد ولا لأ .. ليه؟ علشان وارد جداً إن الـ Compartment دي مش متقفلة ولا متربطة كويس، بالتالي بعد ما عملت فاكيوم وخلصت، فيه شوية هوا ورطوبة إتسربو ودخلو تاني ف انت لو مليت غاز SF6 علي طول كده انت عملت كارثة لأن الغاز كده بقا ملوث بالهواء والرطوبة وعملية معالجته هتحتاج وقت كبير. لكن لو عداد الضغط بتاعنا فضل زي ما هو ومتحركش؟ نروح للخطوة التالتة.
الخطوة الثالثة: الميزان!
الماكينة دي بتبقى راكبة على ميزان ديجيتال دقيق جداً، الميزان ده مش محطوط منظر ده أهم أداة عندك للمراقبة علشان نعرف كمية الغاز (بالكيلو) اللي خرجت من إسطوانة غاز الـ SF6. ببساطة إنت بتشوف وزن إسطوانة الغاز، وبتشوف لوحة البيانات علي الـ GIS Compartment اللي هتملاه محتاج كام كيلو، وبالتالي هتعرف انت هتسحب كام كيلو من اسطوانة الغاز اللي معاك. ولازم تتأكد من نقاء الغاز اللي في الاسطوانة اللي هتشتغل بيها (لا تكون اسطوانة ملوثة بالهواء او الرطوبة)، بالتالي لازم تتأكد إن نقاء الغاز فيها واصل لنسبة 99.99% ودي بنقيسها عن طريق اننا بناخد عينة من الاسطوانة اللي هنشتغل عليها علي جهاز إسمه SF6 Multi Analyzer وبيكون من إنتاج شركة ديلو الألمانية برضو زي ما واضح في الصورة كده.
ساعتها بيبدأ الفني يوصل الخراطيم بتاعته علي الـ Compartment اللي هيشتغل عليه لحد ما يتملأ الوزن المطلوب ونوقف الماكينة.
ملحوظة مهمة: قبل توصيل الخراطيم اللي هنملأ بيهم غاز الـ SF6 في الـ GIS Compartment لازم الخراطيم نفسها يتعملها Vacuum عن طريق اني بوصلها بالماكينة وبشغلها علي وضع الفاكيوم، لأني مش عايز ادخل أي هواء أو رطوبة علي الـ Compartment بتاعي زي ما قولنا قبل كده.
هنا إنت كمهندس موقع ليك دور مهم جدا وهو الـ Inventory Management أو إدارة الخامات والمواد اللي عندك، يعني انت لازم تكون عارف كام اسطوانة طلعت (مفيش اسطوانة بتخرج من المخزن الا بتوقيعك) وكام Compartment اتملي، واحتاجو كمية غاز قد ايه، علشان تعرف اذا كان فيه أي إهدار في الخامات ولا لأ .. خليك مهندس شاطر ومركز!
بعد ما بتخلص بتقفل محبس الملء على الـ GIS نفسه (ده أهم واحد يتقفل الأول) بعدين بتقفل المحبس على الماكينة. دلوقتي بقى ممكن تبص على عداد الضغط اللي على الـ GIS. قرايته لازم تكون متوافقة مع جداول الضغط والحرارة (Pressure-Temperature Charts) للكمية اللي إنت حطيتها.
بتفصل الخرطوم بتاعك (بعد ما تسحب الغاز اللي جواه)، ومبروك، الـ Compartment ده اتملى.. وتكرر نفس العملية دي مع كل الـ Compartments.