بعد اول 3 شهور ليك في الموقع، جه مدير التنفيذ قالك يا بطل جهز نفسك بعد بكرا الساعة 10 الصبح، هتحضر معانا الـ Monthly Progress Meeting علشان تشرح موقف كابلات الجهد المتوسط اللي إنت ماسكها.
انت طبعاً حسيت بزهوة الانتصار. أخيراً هقعد على الترابيزة الكبيرة وهشوف الناس اللي بتقبض أرقام كبيرة دي بتعمل إيه. روحت ظبطت الدنيا ولبست الفيست النضيف، وأخدت معاك الأچندة بتاعتك، ودخلت غرفة الاجتماعات وانت راسم على وشك ملامح الجدية (علشان يقولو ايه المهندس الجامد ده وكده)
الـ Meeting Room كانت تلاجة من التكييف، والقهوة اللي مبتنزلش لحد في الموقع ريحتها بقت دلوقتي مالية المكان. قعدت جمب مدير التنفيذ، وقدامك مهندس التخطيط (Planning Engineer) الخاص بالمشروع، وعلى راس الترابيزة قاعد مدير المشروع.
الاجتماع بدأ، مهندس الـ Planning فاتح شيت الإكسيل علي البروچيكتور وبيعرضه علي الشاشة قدامكم، ومدير المشروع عمال يسأل مدير المدني “نسبة تشطيب الـ Raceways كام % ؟ التأخير سببه إيه؟ هتعوضه إزاي الأسبوع الجاي؟” أرقام بتطير في الجو، وتواريخ، ونسب مئوية وحاجات الواحد أول مرة يشوفها .. بس انت قاعد مستمتع.
وفجأة.. الدور جه عليك مدير المشروع بصلك وقالك أهلاً يا بشمهندس.. سمعت إنك شعلة نشاط في الموقع.. قولي بقى موقف كابلات الجهد المتوسط ايه في المنطقة C ؟ وهل خلصنا الـ Feeder اللي رايح المبني الرئيسي؟
انت (بكل سذاجة) رديت الرد اللي بنقوله لبعض في الموقع “يا هندسة متقلقش.. الرجالة شغالين الله ينور، والدنيا تمام، وإحنا دايسين جامد، وبإذن الله هنسلم في الميعاد ويمكن قبله كمان”
هنا انت بدأت تتوتر.. م انت مش حافظ الأرقام بالظبط.. فبدأت تشغل دماغك اكتر وقولت احاول اطلع وابان اني فاكر الارقام ف قولتله “يعني.. تقريباً كده إحنا شدينا نص المسافة.. حوالي 500 متر أو 600 متر.. حاجة في الرينچ ده”
رد عليك مدير المشروع بكل سخرية واستهزاء “يا بشمهندس.. انا مش قاعد معاك عالقهوة علشان تقولي (الدنيا تمام) و (دايسين). ولا بسأل صنايعي ولا مشرف علشان يقولي (تقريباً) و (حوالي) .. انا بسألك سؤال هندسي محدد:
- الـ (Planned) كان كام متر الأسبوع ده؟
- الـ (Actual) اللي تنفذ كام متر؟
- لو فيه (Variance) أو فرق، سببه إيه؟
- والـ (Look-ahead) بتاع الأسبوع الجاي محتاج مني إيه علشان متقفش؟
انت اتلجلجت.. المصطلحات دي عارفها بس مجهزتش أرقام. أصل.. يعني.. إحنا شدينا يجي نص المسافة.. والباقي شغالين فيه
طب الـ Manpower اللي معاك كام ؟ .. مش عارف
طب هتحتاج Manpower قد ايه لو عايزين نضغط الجدول الزمني اسبوع ؟ .. مش عارف
طب هل فيه حاجة كانت معطلاك الفترة اللي فاتت؟ .. هنا بقا كانت فرصتك وقولتله آآآه يا بشمهندس الحفّار كان عطلان ومكناش عارفين نسحب الكابلات بسبب ان المسار ماكنش كامل، والعطلة دي هي اللي اخرتنا
وهنا مدير المشروع لتاني مرة يخرج عن شعوره ويقولك حفار عطلان؟ وليه مفيش Report ولا ايميل جالي بالكلام ده؟ ليه مش مكتوب في الـ Constraints Log إن عندك مشكلة معدات؟ إنت جاي تبلغني بالمشكلة في الاجتماع؟ الاجتماع ده علشان ناخد قرارات مش علشان تحكيلي حواديت ونتناقش في العطلة كانت فين!!
مدير التنفيذ اللي كان قاعد جنبك حاول يلحق الموقف، وتدخل بسرعة بالأرقام “يا مدير إحنا مخططين 500 متر، نفذنا 350 متر، العجز سببه عطلة في الحفار فعلا وبلغت مسئول المعدات في الموقع،والمشكة مكانتش كبيرة ومخدتش وقت علشان كده مبعتناش لحضرتك حاجة بخصوصها، وهنعوض الفرق ده بـ Overtime يوم الجمعة”
مدير المشروع هز راسه وقال: “أيوه كده.. ده كلام مهندسين.. مش (كله تمام يا ريس)”. انت كملت باقي الاجتماع باصص في الأچندة الفاضية بتاعتك، وحاسس إنك “صغير” أوي، وإن “النوتة والقلم” مش هما اللي بيعملوا مهندس، اللي بيعمل مهندس هو البيانات، الارقام، وان ذهنك يبقي حاضر.
طيب خلينا نحلل الموقف كده ونشوف اللي حصلك ده سببه ايه، وازاي تتفاداه بعد كده؟
لغة “الصنايعية” مقابل لغة “المهندسين/الإدارة”: في الموقع قول للعمال “الله ينور”. لكن في الاجتماع، اللغة الوحيدة المسموعة هي: (نسب إنجاز مئوية- تواريخ محددة – أسباب تأخير واضحة – خطة تعويض). كلمة “الدنيا تمام” دي عند مدير المشروع معناها ان انت مش متابع حاجة.
الاجتماع ليس للمفاجآت: أكبر غلطة عملتها إني قولت “الحفارعطلان” جوا الاجتماع. المشاكل بتتبعت في تقارير يومية أو إيميلات فوراً. الاجتماع معمول علشان نناقش “حل المشكلة” مش نكتشف وجودها.
الـ Look-ahead : هو سأل “محتاج إيه للأسبوع الجاي؟” المهندس الشاطر بيدخل الاجتماع وعارف إنه الأسبوع الجاي محتاج (تصريح حفر، خامة معينة، عمالة زيادة) ويطلبهم رسمي علشان يحمي ويأمن نفسه.
قبل ما تدخل أي اجتماع Progress بعد كده ، لازم تحضر ورقة فيها 4 حاجات رئيسية :
إحنا فين دلوقتي؟ (الـ Status): “يا هندسة، المخطط كان 100، نفذنا 90، نسبة الإنجاز 90%.”
لماذا؟ (Root Cause): “الـ 10% عجز سببهم تأخر توريد ، أو تعارض مع المدني.”
كيف سنعود للمسار؟ (Recovery Plan): هزود فرقة مسائية، أو هشتغل في منطقة تانية جاهزة لحد ما المشكلة تتحل.
ماذا نحتاج؟ (Resources/Support): محتاج حضرتك تضغط على مقاول المدني يسلمني المنطقة (X) بكرة علشان اشتغل.
مدير المشروع مبياكلش كلام .. مدير المشروع بياكل أرقام. ادخل الاجتماع وأرقامك في جيبك، ومشاكلك ليها حلول مقترحة (مترميش المشكلة وخلاص) .. ساعتها هيسمعك ويحترمك. إنما غير كده.. خليك في الموقع أحسن وابعد عن الاجتماعات