لو لسا بتدرس في الجامعة أو كنت حديث التخرج وتايه ومش عارف ايه المجالات اللي تدور فيها ، في المقالة دي هسردلك كل المجالات اللي ممكن تشتغل فيها كمهندس كهرباء مع نبذة مختصرة توضحلك دورك في كل مجال من المجالات دي، ولو تايه لسا وعندك استفسارات زيادة، تقدر تسألني وهجاوبك علي كل استفساراتك
“هجاوبك في المقال ده عن السؤال الأهم عند كل طالب أو خريج من هندسة كهرباء هو: “أنا ممكن أشتغل إيه؟
بحيث بنهاية المقال هيكون عندك خلفية كويسة عن كل مجال وعن الوظائف المتاحة في كل مجال، الدليل ده هيساعدك تاخد رؤية كاملة وتختار الطريق اللي يناسب وهتقدر تحدد ايه اكتر مجال انت هتكون ميال ليه أكتر
الحقيقة إن فرص مهندسين الكهرباء كتيرة ومتنوعة في مجالات ضخمة زي البنية التحتية، المحطات، المباني، الطاقة الشمسية، التيار الخفيف، التوزيع الكهربائي، والأتمتة الصناعية وغيرها من المجالات. وجوا كل مجال من دول بيكون ليك دور حسب المسمي الوظيفي بتاعك
خلينا نبدأ بكتابة المجالات اللي ممكن تشتغل فيها
- Substation
- Infrastructure
- Distribution (Buildings)
- Solar
- Factories
- Sales
- Project Control
- Project Management
وبعدين نتكلم بتفاصيل أكتر عن المجال الأكبر والأوسع إنتشاراً وهو مجال محطات الكهرباء
1. H.V Substations
لو هنرتب المجالات الهندسية من ناحية القوة، التأثير، والمسؤولية… فمجال محطات الكهرباء هيكون في أول القائمة
وده لأنه ببساطة هو العمود الفقري لأي شبكة كهرباء، ومن غيره مفيش مدينة ولا مصنع ولا حتى بيت هيشتغل
هو من اكبر المجالات اللي علي الساحة دلوقتي مش بس في مصر، ولكن في الدول العربية كمان Substations مجال محطات الكهرباء
دورك جوا المحطة مش هيخرج عن واحد من دول
قبل إنشاء المحطة:
1.1. Electrical Tender Engineer
أثناء إنشاء المحطة:
1.2. Electrical Design Engineer
1.3. Electrical Technical Office Engineer
1.4. Electrical Construction Engineer
1.5. Electrical Quality Control Engineer
1.6. Testing & Commissioning Engineer
بعد الانتهاء منها بتستلمها شركة الكهرباء :
1.7. Protection Engineer
1.8. Control Engineer
تعالي دلوقتي ناخدهم واحدة واحدة بنبذة مختصرة عن دورك في كل نقطة من النقط اللي فاتت :
1.1. Electrical Tender Engineer
مهندس التندر هو أول مهندس بيمسك المشروع، قبل التصميم وقبل الموقع وقبل أي حاجة ، هو اللي بيحط تسعير لكل بند من بنود المشروع، وبياخد في اعتباره كل المخاطر المحتمله (زي لو المشروع في منطقة نائية مثلا)، وكمان بيكون عنده خبرة في اسعار البنود وعنده علاقات ومعارف في مجال المشتريات بالذات في مهمات المحطة الكبيرة بيتواصل مع الشركات الخارجية ويعرف اسعارها كام علشان يزود نسبة ربح الشركة ، ويعرف يدي تسعير محترم لكل بند وطبعا بدون مبالغة في التسعير علشان في الآخر المشروع يرسي عليه بدل ما يروح لشركة تانية سعرها اقل منه
نصيحة: مينفعش اول ما تتخرج تشتغل تندر، لازم تكون عديت علي التنفيذ والمكتب الفني علي الاقل واشتغلت فيهم كذا سنة علشان تنقل خبرتك دي بعد كده في التسعير وده هيتقل من وزنك في السوق. وعلي فكرة، مهندسين التندر من اعلي المرتبات في المحطات
1.2. Electrical Design Engineer
مهندس تصميم محطات المحولات هو العقل الهندسي اللي بيحوّل كتيب المواصفات الفنية للمحطة
إلى تصميم فعلي قابل للتنفيذ على أرض الواقع.
شغله بيبدأ بعد استلام كراسة الشروط والمواصفات، وبيكون مسؤول عن ترجمة كل المتطلبات الفنية للكودات والرسومات والحسابات الهندسية.
ودي نبذة بسيطة كده عن الحاجات اللي بيعملها :
- دراسة كتيب المواصفات الفنية للمحطة وفهم نطاق العمل بالكامل
- (AIS / GIS)إعداد التصميم الكهربي للمحطة طبقا للجهود المطلوبة ونوع المظام
- Single Line Diagram إعداد الـ
- إختيار المعدات الرئيسية زي المحولات، القواطع، أنظمة العزل
- تصميم نظام الارضي والحماية من الصواعق
- (Layout-Sections-Details) إعداد الرسومات الأساسية
مناسب ليك لو انت من الناس اللي بتحب الارقام والتفاصيل والحسابات ومبتزهقش من القعدة علي الكمبيوتر (اللي بالمناسبة مش مريحة زي ما معظم الناس متخيلة) ، أما لو بتحب الحركة والفرك ف ده مش مكانك خالص
Primary أو Secondary مهندسين التصميم بيكون عليهم تنافس قوي لندرتهم ولقوة المجال نفسه، سواء مهندسين الـ
.مناسب لحديثي التخرج عادي، وبيكون عليه اشراف ومتابعة قوية من التيم ليدر، ومناسب للشباب والبنات
لو مشروع تخرجك كان في تصميم محطات الكهرباء، هتبقي ميزة تنافسية ليك، لان اللي لاحظته ان كل مشاريع التخرج بتكون دستريبيوشن وكلها بقت شبه بعضها باختلاف المكان اللي مرة يكون قرية سياحية ومرة فندق ومرة مول او مستشفي، وحاجات اتهرست قبل كده كتير جدا
الدراسة وتقديرك في الكلية هنا هيخلوك متميز لو انت لسا في بداية الكاريير وبتدور علي فرصة كويسة، لكن بعد كده التقدير مش بيفرق اوي
1.3. Electrical Technical Office Engineer
مهندس التصميم بيطلع لوحات مش مكتملة، بيحسب حساباته ويطلع احجام الكابلات وعددهم والكلام ده كله، لكن اللوحة بتبقي برضو ناقصة، مش دي اللوحة اللي هياخدها مهندس التنفيذ يشتغل بيها
دي اللي بياخدها ويشتغل بيها وبياخدها من المكتب الفني Shop Drawing مهندس التنفيذ بيستلم لوحة تنفيذية
يعني مهندس المكتب الفني هو الوسط بين مهندس التصميم ومهندس التنفيذ .. طب بيعمل ايه مهندس المكتب الفني بإختصار ؟
Shop Drawing أول وأهم حاجة هي الـ
ودي عبارة عن الرسمة اللي بتوضح طريقة التنفيذ بالتوصيل، يعني انا عندي كابل واصل من مكان (س) إلي مكان (ص)
IFC (Issued For Construction)ودي الرسمة اللي بيتم تسليمها لمهندسين التنفيذ
غير حساب الكميات لجميع البنود، يعمل حصر، مستخلصات سواء لمقاولي الباطن أو مستخلص المالك، تعديلات علي الرسومات واعتمادها من الاستشاري طبقاً لحالة الموقع، غير إن مهندسين التنفيذ بيرجعوله في اي مشكلة فنية في الرسومات لأنه المسئول الأول والأخير عن الرسومات اللي بيشتغلو بيها
مناسب للشباب والبنات اللي بيحبوا التنظيم، الورق، الرسومات، والإكسل، ومش عايزين يقضوا كل الوقت في الموقع، مع العلم إن فيه مهندس مكتب فني في الموقع، ومهندس مكتب فني من الإدارة، وكذلك مناسب لو ده أول شغل ليك
1.4. Electrical Construction Engineer
المهندس اللي بيكون في وش المدفع، وسط العمال والصنايعية .. المهندس اللي عايش يومه فاتح سنترال، مكالماته كلها عبارة عن “إلحق يا هندسة” وهو ملزم يتصرف .. بيتحرك وبيروح وبييجي ويستلم الشغل وينسق علي المعدات، ويشد مع المقاولين، وبيتأكد إن الماتريال إتوردت، وماشي في التنفيذ مع الجدول الزمني للمشروع، بيعمل ريبورتات ويبعت ايميلات ويخلي باله يمين وشمال علشان مش عارف المصيبة هتجيله من انهي ناحية، بيلف في الموقع يشوف الدنيا وصلت لفين ويرتب علي اساسها شغله للأيام اللي جاية .. مهندس الموقع هو خط الدفاع الأخير علشان المشروع يكمل، لأن لو مهندس التصميم غلط، ومهندس المكتب الفني اللي طلع اللوحات التنفيذية غلط .. مهندس الموقع بيشوف ايه اللي يصح وإيه اللي ميصحش، وبيطلب تعديل عليهم هما الاتنين طبقاً لإحتياجات الموقع.
طبيعة العمل وسط العمال والصنايعية، واحياناً المواقع النائية، بتخلي الوظيفة دي مناسبة للشباب وليس للبنات، مهما بنت حاولت تنزل الموقع للأسف مش هينفع تكمل فيه .. ولو ده حصل بتبقي طفرات وحالات نادرة جداً جداً بتكون ظروف الموقع وطبيعة الشغل مساعدة علي كده .. لكن الطبيعي مينفعش للبنات نهائياً
طبعاً مهندس الموقع بداية ممتازة للكاريير بتاعك وهتضاف ليك كتير جداً ، وخصوصا في محطات الكهرباء لأن الخبرات اللي موجودة في مصر معظمها سافر الخليج، والشركات زي ما بتدور علي الخبرة، بتدور علي حديث التخرج اللي فاهم الاساسيات ويقدر يتبني عليه ويفهم الشغل ويستوعب أسرع
1.5. Electrical Quality Control Engineer
مفيش مسمار بيركب في الموقع بدون ما يكون متوافق عليه من مهندس الجودة، مهندس الجودة هو اللي بيستلم الماتريال اول ما بتيجي، ومهندس التنفيذ مبيقدرش يسحبها من المخزن بدون استلامه ليها. غير إنه هو حلقة الوصل بين مهندس التنفيذ والاستشاري (في الشركات الكبيرة) يعني مهندس التنفيذ بيستلم الشغل من مقاولين الباطن، او من الفنيين، وبعدين يسلمه لمهندس الجودة، ومهندس الجودة بيسلمه للإستشاري
غير انه بيروح اختبارات في المصنع علي بعض المهمات اللي الموقع طالبها زي اللوحات، وبيتأكد انها مطابقة للمواصفات قبل ما تتورد للموقع.
محتاج شخص دقيق، حازم، ومبيحبش يمشيها وخلاص. مناسب للشباب مش للبنات لانه شغل موقع. الشباب اللي ، عندهم شخصية قوية ومش بيمشوها صحوبية علي حساب الشغل
مش حاجة كويسة خالص انك تبدأ الكاريير بتاعك بمهندس جودة، لو ناوي علي مهندس جودة، اشتغل مهندس تنفيذ الاول وبعدها بسنتين تقدر تشتغل مهندس جودة وده الافضل
1.6. Testing & Commissioning Engineer
المهندس الجرّاح .. الكعب العالي لمحطات الكهرباء .. الدكتور اللي بيحط لمساته الفنية في الموقع
مفيش حاجة بتركب في الموقع الا وبيعدي عليها يختبرها ويتأكد إن كل وظائفها شغالة، الكابلات اللي بتتسحب في الموقع مهما كان عددهم 1500 ولا 2000 كابل، بيعدي يختبرهم مش كابل كابل .. لأ فردة فردة
شغل تقني عالي جداً ، ممكن يكونو اثناء انشائات المحطة مبيكونش عليهم ضغط شكل اوي، لكن بمجرد ما التنفيذ بيخلص شغل ، والمفروض المحطة تدخل الخدمة، دي اكتر ناس تبتطحن وبيباتو في الموقع لو لزم الأمر
مسئولياتهم عالية جداً لأنهم هما اللي بيراجعو ورا التنفيذ كل الكابلات اللي اتسحبت بيتاكدو ان كل حاجة متوصلة صح مفيش حاجة معكوسة ، بيراجعو علي كل المهمّات، كتابة تقارير وتسليم استشاري وشركة الكهرباء.
طبعا لو عايز تكون مهندس اختبارات وانت فريش دي صعبة شوية شويتين تلاتة، لازم تاخدلك سنتين تلاتة تنفيذ في الموقع كده وتقف مه مهندسين الاختبارات تشوفهم بيعملو ايه وبيشتغلو ازاي، وبعدها تنقل للإختبارات
حرفياً من أندر الناس اللي موجودين في السوق (أندر حتي من مهندسين التصميم) ومرتباتهم ما شاء الله في السما .. بس غلطتهم بفورة .. ومش محتاج اقول انه مناسب للشباب بس مش للبنات
1.7. Protection Engineer
مهندس الوقاية ده بيكون من اقوي المهندسين اللي موجودين في الساحة، وده بيكون مهندس في شركة الكهرباء نفسها (وظيفة حكومية) مش تابع لشركة من القطاع الخاص
بيكون متخصص في انظمة الحماية في المحطات سواء باختيار او تنسيق الحماية، او تحليل الاعطال، مراجعة الاعدادات بتاعة الريليهات واختبارها اثناء التشغيل او بعد الاعطال
لا يفضل انها تكون اول وظيفة، لو عايز حاجة زي كده يفضل تشتغل الاول مهندس تصميم او اختبارات وبعدها تنقل علي الحماية، بس ده لا يمنع انها تنفع تكون اول وظيفة للمهندس الفريش عادي
وبم انها وظيفة حكومية ف دي مناسبة للشباب والبنات، مع مراعاة اماكن المحطات اللي البنات هيشتغلو فيها
1.8. Control Engineer
PLC/RTU مهندس التحكم ده هو مهندس متعين في شركة الكهرباء (وظيفة حكومية) ، وبيكون المهندس المسئول عن انظمة التحكم والإسكادا في المحطة سواء برمجة الـ
ربط الحساسات والمعدات، الاشراف علي الاتصالات بين المحطة ومركز التحكم، ومتابعة الاعطال علي مستوي التشغيل والتحكم
تقدر كـمهندس فريش تبدأ بيه، ومناسب للشباب والبنات
بعد ما استعرضنا كل الوظائف دي، هتلاحظ إن الجميل في مجال محطات الكهرباء إنه مش بيعتمد على تخصص واحد أو شخصية واحدة. سواء بتحب الشغل المكتبي والتحليل والتصميم، أو بتحب تنزل موقع وتشتغل بإيدك وسط المعدات، أو حتى ميال للبرمجة والتحكم والأتمتة دايمًا هتلاقي دور واضح ليك جوا المنظومة دي. محطات الكهرباء هي قلب أي دولة… من غيرها لا مصانع تشتغل، ولا مدن تتبني، ولا اي مشروع هيشوف النور، وعلشان كده الطلب على المتخصصين فيها بيزيد يوم بعد يوم، خصوصاً مع التوسع في المشروعات القومية في مصر والوطن العربي
كمان الميزة الأكبر إن معظم الوظائف دي تعتبر من أعلى الوظائف دخلًا ، لأنك بتشتغل في مجال حساس، تقني، ومحتاج كفاءة عالية ومسؤولية كبيرة. كل سنة خبرة في المحطات بتضيف لقيمتك السوقية وتفتح قدامك أبواب أكبر: شركات فئة أولي، عقود في الخليج، ترقي لمناصب إشرافية وإدارية. لو إنت لسه في بداية طريقك وبتدور على مجال قوي، مستقر، ومربح فعلاً، فالدخول لعالم محطات الكهرباء يعتبر واحد من أذكى القرارات اللي ممكن تاخدها لمستقبلك المهني والمالي
لو حابب اتكلم بتفاصيل اكتر عن أي مجال من المجالات المذكورة في اول المقالة تقدر تسيب في الكومنتات اكتر مجال حابب تعرف معلومات عنه، ولو حابب تحترف مجال محطات محطات الكهرباء ف تقدر تشوف تفاصيل كورس تنفيذ محطات الكهرباء من هنا:
كـورس تـنـفـيـذ مـحـطـات الـكــهــربــاء
أما لو عندك سؤال معين عايز تساله بشكل شخصي، تقدر تتواصل معانا من خلال الايميل التالي :
info@substationmastery.com