ثلاثة مهارات أهم من التقدير الجامعي ومش هتشتغل من غيرهم

أنا بصراحة دايمًا كنت مستغرب… يعني إزاي واحد تقديره “مقبول” ويبقى مطلوب في السوق أكتر من واحد “امتياز مع مرتبة الشرف”؟

الموضوع عمره ما كان واضحلي زمان. بس بعد شوية احتكاك بالمواقع والمهندسين وبعد اترقيت وبقيت فشتغل في الادارة بعد الموقع وبدأت اعمل انترفيوهات، اكتشفت إن الشغل الحقيقي ميعرفش الشهادات قد ما يعرف الشخص اللي بيقف على رجليه ويبقي عارف هو بيعمل ايه وبيشتغل ازاي ويعرف ايه اللي مطلوب منه ويعمله علي أكمل وجه.

فيه 3 مهارات لو معندكش واحدة منهم، هتحس إنك بتغرق كل يوم في الشغل مهما كانت درجتك الجامعية، ومهما كنت شاطر وفاهم والكلام ده كله.

1. Communication Skills – مهارة التواصل

ويمكن دي أكتر حاجة بلاحظها عند الناس اللي بتنجح بسرعة. المهندس اللي بيعرف يشرح فكرته ببساطة ويوصل المعلومة، ويعرف يسمع (اكتر ما يتكلم)، ويعرف يرد من غير ما يدخل في clash خصوصا مع الاقسام التانية اللي معاه في الموقع … ده اللي بيكسب احترام الكل.

في الموقع، انت بتتعامل مع ناس بعقليات مختلفة من العامل للمساعد للفني للمشرف لمهندس زميلك في نفس القسم، لمهندس زميل تاني في قسم مختلف، للسيفتي، للاستشاري.. كل دي ناس لازم تكون بتعرف تتكلم معاهم وتتعامل معاهم وتوصلهم اللي عندك وتفهم منهم اللي عندهم.

يعني مثلا الفني مش هيعمل اللي في دماغك غير لو فاهم إنت عايز إيه ف لو وصلتله المعلومة غلط هيعمل الشغل غلط، والغلط هنا مش هيبقي عليه! غير كده الاستشاري مش هيمشي كلامك غير لو فاهمه ومقتنع بيه.

ملحوظة جانبية كده: لو الفني عمل حاجة غلط في الموقع قدام الشركة انت اللي غلطان مش الفني، وقدام مديرك انت اللي غلطان، انت اللي بتتحاسب علي الشغل مش الفني ولا المشرف.. انت تقدر تحاسبه بينك وبينه واكيد لازم تشارك المشرف بتاع المجموعة في اللي حصل، ويُفضل من الاساس كلامك يكون مع المشرف مش الفني، ولو هتوجه كلامك للفني علي طول يبقي في وجود المشرف وبعد ما تخلص كلامك مع الفني توجه كلامك للمشرف انه المسئول عن العمل. لكن في النهاية انت المسئول الأول والأخير عن إن الشغل يطلع مظبوط مش حد تاني.

وهنا بقى يظهر الفرق… في ناس بتشرح، وناس “بترغي”.

2. Problem-Solving – حل المشاكل

يمكن دي روح الشغل كله. لأنك مهما عملت planning ومهما جهزت drawings، هتلاقي المفاجآت بتطلع لك واحدة ورا التانية.

المسامير بتاعة عجل الـ Transformer مش داخلة فيه ومش عارفين نركبها وفيها مشكلة

ماكينة الـ DILO بعد ما جات والسيفتي عملها Inspection اترفضت.

الـ Supervisor اللي الـ supplier باعته علشان يركب الـ Transformer موقف الشغل علشان فيه حفّار شغال وعامل تراب.

الدنيا قلبت هواء بتراب جامد أثناء ما الفنيين بيركبوا نهاية outdoor وبالتالي لازم نوقف الشغل.

الفني اللي بيشتغل معاك… اعتذر آخر يوم.

اهي كل المشاكل دي حصلت وبتحصل ولسا هتحصل في المواقع، ولازم تكون عارف هتتصرف ازاي في كل موقف، وتكون مجهز نفسك ذهنياً ونفسياً ان الدنيا مش هتكون وردي خالص، وان القاعدة إن انت تلاقي مشاكل، مش ان الدنيا تمشي سالكة كده.

وقدرتك علي تجاوز المشاكل دي هي اللي بتميزك عن غيرك. علشان كده لازم تتعلم وتستفيد من اي حد عنده خبرة اكتر منك وتسمع منه عن اي مشكلة واجهته وهو اتصرف فيها ازاي .. والغرض مش بس انك تتعلم حل المشكلة، خليك ذكي .. الغرض انك تتعلم طريقة التفكير اللي وصلته للحل وده الأهم مليون مرة

3. Ownership – إنك تبقى صاحب الشغل

ودي حاجة عمري ما شوفتها مكتوبة في CV، بس بشوفها في شغل المهندسين الناجحين.

لما تبقى أنت “صاحب الشغل” مش مجرد واحد بيخلص اللي عليه، بتلاقي نفسك طبيعي بتراجع نفسك قبل ما حد يراجعك… وبتسأل نفسك قبل ما حد يسألك… وبتحل اي مشكلة قبل ما حد يحس ان فيه مشكلة من الاساس.

وهنا لا بد من ذكر حاجة مهمة، إنك تبقي صاحب الشغل مش معناها انك تشوف نفسك إبن الشركة، ولا تاخد من صحتك ووقتك ومجهودك بدون مقابل. الكلام هنا علي حاجتين أساسيين، ان الشغل يتعمل بضمير بدون تقصير، وإنك تحس بالمسئولية فعلاً تجاه الشغل اللي بتعمله، لو بتشتغل تقضية واجب صدقني هتفضل طول عمرك مهندس عادي، وبتقبض مرتب عادي، ولو فيه ترقية او بونص مش هتكون من الاولويات، لازم تحس ان الشغلانة دي بتاعتك من الالف الي الياء انت اللي ماسك كل حاجة فيها ومسئول عن نجاح كل جزء فيها.

وفي الآخر؟

التقدير الجامعي مهم… بس ولا يساوي 20% من قيمة مهندس التنفيذ. الـ Skills دي هي اللي بتحدد إنت رايح لفين، ورايح بسرعة ولا علي مهلك.