كتير من مهندسين الموقع بيركزوا جداً في تجميع جسم المحول والـ Bushings والـ Radiators، لكن ممكن تفصيلة صغيرة جداً زي “كوب الزيت” أو الـ Oil Sealing Cup اللي تحت الـ Breather تضيع مجهود كبير لو اتركبت غلط أو اتنسى يتحط فيها زيت أصلاً.
في المقالة دي هنتكلم فنياً وعملياً عن القطعة دي، وإزاي تستلمها صح وأنت بتركب المحول في الموقع.
أولاً: الفكرة العلمية والفنية
الـ Oil Cup هو الجزء السفلي الشفاف الملحق بجهاز التنفس (Silica Gel Breather) الخاص بمحول القدرة. الفكرة الهندسية منه مش مجرد تجميع أتربة، لكنه بيقوم بوظيفة فيزيائية مهمة جداً وهي عمل عزل هيدروليكي أو Oil Seal.
ليه بنحتاجه؟ المحول لما بيسخن الزيت بيتمدد والهواء بيخرج، ولما بيبرد الزيت بينكمش وبيسحب هواء من الخارج (عملية الـ Breathing). الـ Silica Gel وظيفتها تمتص الرطوبة من الهواء ده. لكن لو الهواء الخارجي لامس الـ Silica Gel بشكل مباشر ومستمر حتى والمحول مش بيتنفس (في حالة السكون)، الـ Gel هيشبع بالرطوبة بسرعة جداً ويفقد خواصه.
هنا بيجي دور الـ Oil Cup بوظيفتين اساسيين:
- العزل، بيفصل مادة الـ Silica Gel عن الهواء الجوي المباشر في حالة عدم النتفس
- التنقية، لما المحول يسحب هواء، الهواء بيعدي الأول من خلال الزيت اللي في الكوباية، فالزيت ده بيصطاد الأتربة والشوائب قبل ما توصل للـ Silica Gel، وبالتالي بيطول عمرها الافتراضي وبيحمي زيت المحول الداخلي.
ثانياً: التركيبات وواقع الموقع
نيجي بقى للكلام المهم ليك كمهندس تنفيذ في الموقع. الـ Breather بييجي غالباً مفكوك أو راكب بس الـ Cup فاضية عشان النقل. طيب إزاي بيتم التركيب صح؟
الـ Oil Cup كجزء في المحول، محتاجين نحط فيه زيت .. بس كمهندس موقع لازم تسال نفسك اسالة بديهية وهي الزيت اللي هحطه ده نوعه ايه، هجيبه منين، هحط كمية قد ايه، وهقفل شغلي ازاي ؟
كل خطوة لازم تكون عارف تفصيلتها ايه، ومتستناش تتفاجيء في الموقع انك اول مرة تشوف التركيبات دي
1. نوع الزيت
أثناء التركيب وملء الزيت بنستخدم نفس نوع زيت المحول. أوعى حد يفتكس ويحط أي نوع زيت تاني ها .. إوعي!
طب علشان تكون عارف ليه بنعمل كده .. زيت المحولات بيتميز إن لزوجته منخفضة جداً، يعني خفيف وسائل زي الميه تقريباً. ده بيسمح لفقاعات الهواء إنها تمر خلاله بسهولة جداً بأقل ضغط ممكن، المحول لما بييجي يتنفس (سواء شهيق أو زفير) فرق الضغط بيكون صغير، فمحتاج وسط يعدي منه بسهولة.
غير كده الـ Breather متوصل مباشرة بحيز الهواء اللي فوق الزيت في الـ Conservator. أثناء عملية الزفير، الهواء اللي خارج من المحول بيكون شايل معاه أبخرة زيت ساخنة من التانك الرئيسي. لو الزيت اللي في الكوباية نوعه مختلف، ممكن يحصل تفاعل كيميائي بين أبخرة زيت المحول والزيت الغريب ده. التفاعل ده ممكن ينتج عنه مواد حمضية أو رواسب تتكون جوا الكوباية وتسد مسار الهواء، أو الأخطر إن الأبخرة دي ترجع تاني للمحول ملوثة بمركبات غريبة تضرب الـ Dielectric Strength لزيت المحول على المدى الطويل.
أما أثناء عملية الشهيق العنيف مثلاً لما المحول يبرد فجأة بعد فصل الحمل.. سرعة دخول الهواء ممكن تسحب معاها رذاذ خفيف جداً من زيت الكوباية يطلع لفوق ناحية حبيبات السيليكا. لو الزيت اللي موجود كان نفس زيت المحول ف تأثيره علي الـ Silica Gel بيكون محدود لأنها مصممة إنها تتحمل نسب ضئيلة منه. أما لو كان نوع زيت تاني ف الزيوت دي بتعمل طبقة عزل قوية جداً. لو رذاذ الزيت الغريب ده وصل لحبيبات السيليكا، هيغلف المسام بتاعتها تماماً، وهيعزلها عن الهواء. وكده السيليكا هتكون فقدت وظيفتها في امتصاص الرطوبة لأنها اتغلفت بطبقة زيت، وهتلاقي لونها سليم بس هي فعلياً ميتة ملهاش لزمة والرطوبة بتعدي للمحول.
2. مستوي الزيت
الكوباية بيكون عليها علامة أو خط محفور لازم تملي عنده بالظبط. لو مليت زيادة أول ما المحول ياخد حمل ويبدأ يتنفس لجوا بعنف، ضغط الهواء ممكن يسحب الزيت ده ويدخله جوه الـ Silica Gel نفسها. لو الزيت وصل للـ Gel، المادة المسامية بتتسد والـ Breather كله بيبوظ ومحتاج يتغير. أما لو مليت أقل ف الماسورة الداخلية مش هتكون غاطسة في الزيت، وبالتالي الهواء هيدخل ويخرج من غير ما يعدي على الزيت من الأساس، يعني كأنك مش مركب حاجة، والرطوبة هتدخل تضرب الـ Gel في أيام.
3. الجوان والرباط
لازم تتأكد إن الجوان بايت مكانه صح ومش مقطوع. والربط يكون بحرص، الكوباية دي غالباً بتكون أكريليك أو زجاج، والقرص الجامد عليها بيكسرها فوراً، وده مشهد بنشوفه كتير في المواقع.
في النهاية.. التركيبات مش بس ونش بيرفع ومعدة بتنزل، مهندس الموقع الشاطر مش هو بس اللي بيعرف يوقف الونش ويسنتر المحول على القاعدة، المهندس “التقيل” بيبان في التفاصيل الصغيرة اللي الأغلبية بتعتبرها كماليات، زي ضبطة الـ Oil Cup دي.
الخبرة في مجالنا مش مجرد سنين بتعدي، الخبرة هي تراكم لمواقف ومشاكل وحلول شفتها بعينك وعرفت أسرارها.
وعشان تختصر على نفسك سنين من التجربة والخطأ، وتشوف الموقع بعين خبير شاف كل المشاكل دي قبلك، جمعنا لك كل تريكات التنفيذ وأسرار الموقع اللي مابتتقالش في الكتب في كورس Substation Execution Mastery.